科技巨擎最近股價節節上升，美國方面稱佢地為 FAAMG，即 Facebook、Apple、Amazon、Microsoft 及 Google。
這五家科技巨擎各有強項，由今個星期開始，石先生同大家睇返呢五間備受關注嘅公司到底發展成點，未來又可以係點。
Facebook，你我他都有用嘅 Social Network，喺大家眼中佢係消閒，留意朋友動態嘅地方，加埋佢旗下嘅 WhatsApp、Messenger 及 Instagram，作為一個城市人要脫離 Facebook 嘅魔掌真係唔容易，而溝通似乎係佢最大嘅賣點。
但 Facebook 真正贏嘅唔係溝通，係贏咗成百年來無咩點轉變嘅傳媒。以前傳媒最大嘅優勢係傳播渠道，商家有嘢想話畀消費者知，搵傳媒都算係最有效嘅方法，但今時今日你有嘢想同消費者講？搵 Facebook，佢幫你搵想要嘅人出來，連以前賺開呢啲廣告錢嘅傳媒都要畀返錢 Facebook，你話佢有無錢途。
有 Facebook 後，人人都係記者，邊到撞車有意外，你去啲交通消息 Group 仲快過即時新聞，連 999 都未收唔到 call 嘅，Facebook 一樣有，試問傳媒又點鬥。
自傳媒呢個行業出現以來，從來都未試過被淘汰，但而家連被稱為龍頭嘅《蘋果日報》都要外判，炒哂啲記者編輯再打包外判報導，你就知道傳媒經營有幾困難。
Facebook 只要繼續保持到佢傳播嘅領導地位，就算大家每日睇少 Facebook 兩三分鐘，佢可以繼續賺廣告商錢，盤滿砵滿。
啲人唔想用 Facebook？父母輩必用嘅 WhatsApp 係佢嘅，Double May同ptgf 最愛嘅 Instagram 又係佢嘅，利用傳播渠道來賺錢呢樣嘢，Facebook 都舖好哂路。就算 Facebook 下滑，佢一樣有 Instagram 及 WhatsApp 兩手牌，其實都幾穩陣。
作者：石先生（科技博客Stone IP）
19＋精選推介︰
===============財經精選資訊網站「中環街市」 臉書粉絲頁
