話說早幾日有段片好紅，話日本電視台用最新技術將鄧麗君翻生，用全息技術將佢變成立體放出來同觀眾表演，個個見到嘆為觀止，開心 Share。
不過，事實又點會咁簡單呢？鄧麗君又點會咁輕易翻生，全息技術都出現左咁多年，又點會依家先有巨大進步呢？講到底，呢個只不過係「投影」，即係你都可以做到。
先唔好講有傳媒概念不清，將「全息技術」當作做「AR」呢個極大的技術性錯誤，而係日本電視台口中嘅「全息技術」係播出來嘅電視畫面入面，似乎完全唔係個回事，只係將「投影」配合「Chroma Key」，令電視觀眾覺得真一樣。
睇嘅時候感覺有啲怪，但講唔出，直到求先 on9adget 出左啲原片比較即刻明哂，只能夠講，現場觀場嘅演技仲好過「中國好聲音」個啲。
唔好講咁多，先去片睇睇！
睇完呢條對比片，你明未呢？有無留意到啲角度？有無留意到原片及新片嘅差別係邊到？簡單講，如果係全息技術，拍攝角度不受限制，而且拍出來應該會見到有實物作為被投影物。
我地睇到嘅電視版本好明顯係將原片嘅鄧麗君裁左出來，然後再提升佢畫面質素做左高清，而每一個原片嘅交接位就用現場觀眾反應來過場，根本就係騙案，可憐係呢個最緊要快，最緊要爆嘅年代，人人中伏。
好啦！咁到底咩係 VR、咩係 AR？咩係 VR 呢？而全息技術又係咩呢？下面同大家簡單解釋清楚。
首先，VR 即係你依家周街見到嘅 HTC Vive、PlayStation VR 咁。用戶要戴個頭框，然後入左去個個虛擬世界，即係話用戶入左去，就睇唔到現實世界做緊咩。
AR 就調轉，係將現實世界放係手機、平板呢啲電子產品入面，然後你可以望到手機平板入面有啲野郁下郁下，個個就係 AR。
MR = VR + AR，即係你要戴個眼鏡，而你望到現實世界，但眼鏡上面又有消息彈出來，俾啲虛擬嘅野你睇，感覺有啲似你去睇 3D 電影，你要戴左眼鏡先睇到啲效果一樣。
VR、AR、MR 三者有個共同點，就係要用戶點都要拿住一啲電子產品先見到個效果，而全息技術就完全唔駛，呢個就係全息技術。
「全息技術」簡單來講係「投影」，不過「投影」係平面，而「全息技術」就係全形度嘅投影，你係唔同角度睇到嘅野都唔同，係立體嘅，而且投影出來嘅影像識得互動，就好似我地睇「美國隊長 2」入面，一班神盾局高層開會時使用嘅就係「全息技術」。
至於今次呢個鄧麗君翻生，現場係唔係全息技術要係現場先知，但照電視畫面睇只係一個「投影」+「Chroma Key 嘅拍攝手法」。不過算啦！係一個要炒人先炒 IT 嘅城市，呢啲技術野邊有人理，算數罷啦！
【此文章刊載於 石先生部落；標題： 鄧麗君翻生？它不過是「投影」+「Chroma Key 拍攝」，不僅不是「全息技術」，更別說是 AR；本篇文章為贊助內容；強制廣告： HisTrend.HK 給你不一樣的科技產品】
Shares 166
