石先生呢輪都唔知做咩鬼，個人成日都多愁善感，鬼咁多感性說話係個腦到湧出來，真係唔打出來屈住屈住個人仲唔舒服，所以都係打出來，咁石先生自己會好過少少。
人生來到三十幾，好命啲行左三分一，對人生總有少少體會。人生軌跡呢樣野，由細到大唔知邊到都會話你知因果循環，然後係圖嘅解象都係線性，即係你做左 A 會有 B，然後會有 C 再有 D，但其實人生真係咁咩？
「因果循環」係嘅，你做左啲野係會影響到其他野，但唔代表你做左 A 一定 B，唔代表你讀書叻就一定名成利就，讀唔到書就發唔到達，人生仲有好多因素影響，並唔係直線。
有人話人生好似揸車咁，係一條路，你揀左個條路就會係個條路上面行，然後去到一啲十字路口，你就要選擇繼續行，轉入小巷，或者轉另一條路，而每一個抉擇都會影響你後面。
咁樣聽落無錯，但香港都有一樣野叫「六合彩」啦！人生雖然喺係一條路上行，但係你可能會遇到怪獸要逃避，要打敗佢，行嘅路上可以有夥伴一齊行，也會有夥伴中途離開，當中也可能有啲位能夠課金加命，但始終人生同遊戲一樣，好多野都有不確定性。
你做左 A 可能有 B，但也有可能變左個 D E F 出來，或者突然去到一個神奇位，爆左個神秘隧道出來，帶你去左 X Y Z，每一樣野都有可能，你要有咁嘅覺悟，人生咩都有可能。
每一個人嘅人生都係屬於自己，條路點行，不確定性係點都係自己先知。人地行左呢左去 A 呢個位會彈去 C，但你能量或者道具唔同，或者 C 個度爆棚，咁你去 A 呢個位係彈去 P 都唔出奇。
任何人俾你嘅都可以係意見，但點行，揀咩位個個係你自己，你自己先知自己應該做咩，唔應該做咩，未來應該係點。當然，聽多啲人嘅意見，見識多啲係一件好事，但唔代表你係人生嘅重要道路上一定要聽嗰個人嘅意見，因為意見始終係意見，最終執行個個係你自己。
自己嘅人生，自己要決定點行。聽多啲人嘅意見係好，但自己都要有分析能力，自己都要下決定。
【此文章刊載於 石先生部落；標題： 人生唔係線性，係充滿不確定性…；本篇文章為贊助內容；強制廣告： HisTrend.HK 給你不一樣的科技產品】
