【中環街市】香港寛頻　耕開有人爭？

香港寛頻 耕開有人爭？

（作者：科技博客 Stone IP 石先生）

曾幾何時，香港寛頻電視推出咗無人知，播緊咩都無人知，即使好似要摺埋都無人知。當舊老細王維基賣走香港寛頻，人人以為佢命不久矣，無咩發展之時，邊個又會估到香港寛頻竟然絕處逢生，成為大台（TVB）的首選合作夥伴。

幾個月前，楊老闆豪言要快啲同樂視合作，希望樂視快啲有英超播，到時就專注同樂視拍住上，摺咗香港寛頻電視…

左擁英超 右抱大台

誰知樂視英超還未播，大台又搶住同香港寛頻合作，推出激平套餐搶用戶，再送機頂盒及手機 Apps，實行左擁英超，右抱大台，最緊要就係上客達到 100 萬。

回帶返去兩年前，試問邊個估到香港寛頻會成為人人在意的合作夥伴。不過時勢唔同，喺網際網路時代擁有網路就係最大優勢，不論樂視定大台想做網際網路電視都一樣要頻寬。現在Now台本身客多服務多，商廈及住宅外仲要為收費台服務，加上四月開波的免費台同公司政策，想合作真係難過登天。

相反剛剛買起咗新世界電訊的香港寛頻實力愈來愈強，頻寛多服務少，大把合作空間，想做網際網路霸主都要交租先，搵香港寛頻拍擋係最快方法，始終要拉條光纖唔係上網咁簡單，你唔搵唔香港寛頻合作，難道搵死唔斷氣的九倉電訊嗎？

瘦田無人耕，耕開有人爭。香港寛頻早輪同樂視合作後成街 Promoter 由藍白衫變哂黒白衫，唔知今次同大台合作又駛唔駛換衫呢？

===============
財經精選資訊tumblr網站「中環街市」
FB粉絲頁： https://goo.gl/kKVS7u